Skessuhorn:

Vilja að prestur búi í Stafholti

9. febrúar 2010

Meginþorri sóknarbarna í Stafholtsprestakalli hefur skrifað undir bænarskjal til biskups þess efnis að byggður verði nýr prestsbústaður í Stafholti til að prestur geti setið staðinn. Það var Sigurjón Valdimarsson bóndi á Glitstöðum sem afhenti herra Karli Sigurbjörnssyni biskupi undirskriftalistann í gær fyrir hönd sóknarbarna. Biskup gaf við það tilefni ekkert uppi um hver framvinda yrði varðandi prestsbústað, en þakkaði sóknarbörnum í Stafholti fyrir.  Áskorunin var svo hljóðandi: “Við undirrituð sóknarbörn og velunnar Stafholtsprestakalls í Borgarfirði óskum eftir því að sem fyrst verði hugað að uppbyggingu prestssetursins í Stafholti. Ekki er viðunandi að presturinn sitji ekki staðinn. Er því skorað á kirkjuyfirvöld að hraða svo byggingu nýs íbúðarhúss í Stafholti að það verði tilbúið þegar leigutími núverandi bústaðar prestsins rennur út.”